នៅរសៀលថ្ងៃពុធ ២ កើត ខែ ភទ្របទ ឆ្នាំ ឆ្លូវ ត្រីស័ក ព.ស ២៥៦៥  ត្រូវនឹងថ្ងៃទី ០៨ ខែ កញ្ញា ឆ្នំា២០២១ ការិយាល័យមេធាវីខ្មែរ និងសហការី (Khmer Law Office & Associates) និង ក្រុមហ៊ុនប្រឹក្សាព័ត៌មានពាណិជ្ជកម្ម ស៊ៀកមឺនជីនហាវ (Ideal Business Consultant Co., Ltd) ដែលមានទីស្នាក់ការកណ្តាលនៅសាធារណរដ្ឋប្រជាមានិតចិន បានចុះហត្ថលេខាលើអនុស្សរណៈយោគយល់ ស្តីពីកិច្ចសហប្រតិបត្តិការពាណិជ្ជកម្ម និងកិច្ចសន្យាផ្តល់សេវាកម្មផ្លូវច្បាប់។ លោក យ៉ាង ចឺ សៀង ប្រធាន  ក្រុមហ៊ុនប្រឹក្សាព័ត៌មានពាណិជ្ជកម្ម ស៊ៀកមឺនជីនហាវ និងលោកមេធាវី ចាន់ ហឿន តំណាង

ឲ្យ ការិយាល័យមេធាវីខ្មែរ និងសហការី បានស​ម្តែងគារវកិច្ចដ៏ខ្ពង់ខ្ពស់ទៅវិញមក តាមរយៈវីដេអូ (ZOOM)។

ពិធីចុះហត្ថលេខាលើអនុស្សរណៈយោគយល់នេះ អាចផ្តល់ប្រយោជន៍អោយភាគីទាំងពីរ  អាចជួយគ្នាទៅវិញទៅមក  ដោយឈរលើមូលដ្ឋាននៃការស្វែងរកផលប្រយោជន៍រួម និងផ្តល់កិច្ចសហការការងារយ៉ាងស្អិតរមួត

រវាងភាគីទាំងពីរ លើវិស័យផ្សេងៗរួមមាន ពាណិជ្ជកម្ម  វិនិយោគ អន្តោប្រវេសន៍ និងសញ្ជាតិ។   លោកមេធាវី ចាន់ ហឿន បានបញ្ជាក់ថា ការិយាល័យមេធាវីខ្មែរ និងសហការី ត្រូវបានបង្កើតឡើងក្នុងឆ្នាំ ២០០៤ ហើយធ្លាប់បានសហការជាមួយក្រុមហ៊ុនបរទេសជាច្រើន ដោយបានផ្តល់ឱ្យក្រុមហ៊ុនទាំងនោះនូវសេវាកម្មផ្លូវច្បាប់ ប្រកបដោយវិជ្ជាជីវៈ និងភក្តីភាព ។ លោកមេធាវី ចាន់ ហឿន បានស្វាគមន៍ និងថ្លែងអំណរគុណយ៉ាងជ្រាលជ្រៅចំពោះ  ក្រុមហ៊ុនប្រឹក្សាព័ត៌ពាណិជ្ជកម្ម ស៊ៀកមឺនជីនហាវ  ដែលបានជ្រើសរើស

យក  ការិយាល័យមេធាវីខ្មែរ និងសហការី ជាដៃគូសហការ ហើយសង្ឃឹមថា តាមរយៈអនុស្សរណៈយោគយល់នេះ ភាគីទាំងពីរអាចពង្រឹងកិច្ចសហប្រតិបត្តិការជាមួយគ្នា ដើម្បីធ្វើឲ្យកម្មវត្ថុនៃអនុស្សារណៈយោគយល់នេះ សម្រេចបានដោយជោគជ័យ។